خبرهای فارسی
اخبار موسیقی، اخبار آی تی، اخبار ورزشی، اخبار استخدامخبرهای فارسی
اخبار موسیقی، اخبار آی تی، اخبار ورزشی، اخبار استخدامعلی جوادپور
گؤزلرین کیمی / علی جوادپور
گؤزلرین کیمی
علی جوادپور
بو یاز گلیشیندن بللی‌دیر،
نئجه یازدیر!
بیلیرم یئنه اؤلوب ـ دیریله‌جه‌یم
بیر جیغیردان یاپیشیب
نئچه داغین باشینا دولاناجاغام
من کی یانار اوجاغام
دئشیله‌جک کؤزوم
داماریمدا قانیم قاینایاجاق
اریییب کئچه‌جه‌یم ایینه گؤزوندن
دویمایاجاغام بو یازین گؤزللیییندن!
یورولماق بیلمه‌یه‌جه‌یم
اَیر یورولسام؛
یورغونلوغومو یوخویا چاتاجاغام
یوخومو سحر یئلینه!
دلی‌لیییم قوشولاجاق بو یازین دلی‌لییینه.
بو دلی یاز یاشیل اولاجاق گؤزلرین کیمی
بو دلی یاز گؤزللیک بیتیره‌جک!
بو دلی من، اؤلوسو اولاجاغام،
اؤلمک ـ دیریلمک بیتیره‌جه‌یم!
بو یاز یئنه اؤلوب ـ دیریله‌جه‌یم
بیلیرم.
یاز-1383
علی جوادپور
قاتار قاییتماز / علی جوادپور
قاتار قاییتماز
علی جوادپور
نه اؤزون گلیرسن، نه‌ده خبرین
یوخ، سنی آپاران قاتار قاییتماز.
یول‌لار یادیرغایار، اونودار
یول‌لار کورک اوسته یاتار،
قاتار قاییتماز!
گئده‌ر دیانماز کی ایلین قاتاری
گئده‌ر بئی قاتاری، گلین قاتاری
کیم دئییر قایتاراق گلین قاتاری
گئده‌ر گؤزدن ایتر، قاتار قاییتماز.
گئتدین ایندن بئله هر گلنده یاز
سولغون گؤرونه‌جک چیچک‌لر بیر آز
سونبول‌لر ساچینی کولک داراماز
ایل‌لر باشا چاتار، قاتار قاییتماز.
گئدنده دولویدو بو بوش قاتارلار
دونیا قاتار- قاتار بوشالار، دولار
کیمدن کوسمک اولار، اینجیمک اولار
الین هارا یئتر، قاتار قاییتماز.
یاغیش یادداشلاردان ایزلر اونودور
هر گون عؤمروموزدن بیر گونو اودور
یالاندان گؤزله‌ییر “علی جوادپور”
یوخ، سنی آپاران قاتار قاییتماز.
علی جوادپور
پاییز / علی جوادپور
پاییز
علی جوادپور
مئشه‌ده پاییز،
بیر آغاجین یارپاغیندان باشلانیر
یارپاق- یارپاق پاییزلاییر آغاج‌لار
آغاج- آغاج پاییز یاییر آغاج‌لار !
چؤره‌ک حسرتینیز اوره‌ییمی آلدی
پاییز کوله‌یی کیمی
آی قارا آج لار !
آی آغ آج لار !
قویمادی آغزیمدا تیکه‌می اودام!…
پاییزلاییر دونیامیز
آدام- آدام !…
علی جوادپور
نوستالوژیا/ علی جوادپور
نوستالوژیا
علی جوادپور
بو گویون آلتیندا،
بیر یئر تاپمازسان
دوغاسان شعرینی !
سانجیسی اؤلدورر سنی !
بالان جانینا ایلیشَر قالار
جانینا بالا اولار!
کیتاب – کیتاب ایتَرسن !
نوبئل-نوبئل ایتَرسن!
بو گویون آلتیندا بیر یئر تاپمازسان،
بایراغینی تاخاسان
بویونا-بوخونونا باخاسان
دونیایا دالغالاناسان !
قولتوغونون آلتیندا قالار؛ گویون، قیرمیزین
یاشیل چمدانیندا قالار؛ آیین،اولدوزون!
بو گویون آلتیندا ،
بئله سارالارسان؛
قیزارماغی باجارماسان!…